Urukiko rukuru rwa Uganda rwategetse ko abasirikare n’abapolisi bava ku rugo rwaRobert Kyagulanyi uzwi kandi nka Bobi Wine waruhanganye na perezida yoweri museven mumatora aheruka kuba muri Uganda.
Bobi Wine n’umugore we n’umwana muto wari wabasuye bafungiye mu rugo rwabo kuva amatora ya tariki 14 z’uku kwezi yarangira kugeza uyumunsi.
Mu cyumweru gishize, abanyamategeko bahagarariye Bobi Wine batanze ikirego baregera urukiko gufungwa kw’uyu muhanzi wabaye umunya politike.
Leta ivuga ko kumufungira iwe ari igikorwa cyari kigamije kumubuza gutegura imyigaragambyo yamagana ibyavuye mu matora, Bobi Wine avuga ko ayo matora yibwe.
Mu matora, Perezida Yoweri Museveni yatsindiye manda ya gatandatu n’amajwi hafi 59%, mu gihe Robert Kyagulanyi bari bahatanye cyane yagize hafi 35%.
Urukiko rukuru rwavuze ko gufungira Kyagulanyi iwe mu rugo “ari igikorwa kinyuranyije n’amategeko”.
Ntibizwi neza niba icyemezo cy’uru rukiko gihita gikurikizwa.
Ibihugu, imiryango yigenga n’abantu ku giti cyabo, banenze ko amatora muri Uganda yaranzwe no gupyinagaza no kwica abatavugarumwe n’ubutegetsi, bamagana n’ifungwa rya Bobi Wine iwe mu rugo.
Umuryango w’ubumwe bwa Africa wavuze ko amatora muri Uganda yagenze neza kandi yabaye mu mahoro asesuye.
