Zimbabwe: Hagiye gutangira Imyigaragambyo igamije kweguza Perezida.

0
57
Zimbabwe's President Emmerson Mnangagwa attends the World Economic Forum (WEF) annual meeting in Davos, Switzerland January 24, 2018. REUTERS/Denis Balibouse

Abatavuga rumwe n’ubutegetsi ndetse n’imiryango itegamiye kuri leta bari gukora ubukangurambaga ku myigaragambyo iteganyijwe kuba mu gihugu hose ku itariki ya 31 y’uku kwezi kwa karindwi.

Aba bavuga ko iyi myigaragambyo igamije gusaba Perezida Emmerson Mnangagwa kwegura mu maguru mashya.

Ibi ngo ni ukubera ko hari ibikorwa biri gukorwa n’ igipolisi bitwaje gucunga iyubahirizwa ry’ ingamba zo kwirinda Coronavirus nyamara bakabangamira uburenganzira bw’ abanenga leta ya Mnangagwa.

Kuri iki cyumweru tariki ya 19/7/2020 Polisi ya Zimbabwe yatangaje ko abantu barenga 105,000 bamaze gutabwa muri yombi guhera mu kwezi kwa gatatu bashinjwa kurenga ku ngamba zo guhagarika ubwandu bwa coronavirus.

Yongeyeho ko abarenga 1,000 batawe muri yombi mu minsi itatu ishize kubera “ingendo zitari ngombwa” cyangwa kubera kutambara agapfukamunwa.

Amabwiriza ya ‘guma mu rugo’ yaradohowe buhoro muri iki gihugu aho abantu 1,611 bamaze gutangazwa ko bayanduye, muri bo 25 yarabishe.

Kuri ubu bijyanye n’ingamba ziriho, Abanya-Zimbabwe bose basubiye mu gihugu bavuye mu mahanga basabwa kuguma mu kato mu gihe cy’ibyumweru bitatu ahantu hateganyijwe na leta.

Polisi ivuga ko kugeza ubu abantu 276 bose hamwe bamaze gutoroka ibigo by’akato, barimo na bamwe bari basanzwemo Covid-19.

Abagera hafi kuri 30 batawe muri yombi, ndetse biteganyijwe ko bagezwa mu nkiko baregwa gushyira mu kaga imiryango yabo n’abaturanyi, nkuko polisi ibivuga.

BBC