Ubwishingizi bwo mu Rwanda bugiye guhuzwa n’ubwo mu bindi bihugu
2019-06-06 ubuzima

Umunyamabanga wa Leta muri Minisiteri y’Imari n’Igenamigambi ushinzwe Igenamigambi, Dr Uwera Claudine, yatangaje ko itegeko rishya rigenga umurimo w’ubwishingizi mu Rwanda, riteganya ko buhuzwa n’ubw’ibindi bihugu byo mu karere n’ahandi.

Ibi bizatuma habaho ihuzabikorwa ku buryo ubwishingizi abanyarwanda n’abaturarwanda bagiye bafata mu bindi bihugu buzemerwa mu Rwanda, ndetse n’ubwahafatiwe bwemerwe mu bindi bihugu.

Ubwo kuri uyu wa Gatatu, Dr Uwera, yagezaga ku badepite isobanurampamvu ry’umushinga w’itegeko rigenga imitunganyirize y’umurimo w’ubwishingizi, yavuze ko rifite impinduka nyinshi ugereranyije n’iryo mu 2008 ryakoreshwaga.

Yavuze ko ishyirwa mu bikorwa ry’itegeko ryari risanzwe rigenga imitunganirize y’umurimo w’ubwishingizi ryagiye rigaragaza inenge n’ibyuho binyuranye.

Birimo kuba ingingo zimwe na zimwe zisa ku bwishingizi bw’ubuzima n’ubwishingizi bwa rusange kandi iyo mirimo yombi y’ubwishingizi itandukanye.

Rigamije gushyiraho umurimo w’ubwishingizi buri wese yibonamo hashyirwaho ibikorwa by’ubwishingizi buciriritse n’ingingo z’itegeko z’ubwishingizi bw’ubuzima zitandukanye n’izireba ubwishingizi rusange.

Dr Uwera yavuze ko mu gushyiraho itegeko hakenewe kwita ku mpinduka ziteganijwe n’Umuryango w’Ibihugu by’Afurika y’Iburasirazuba (EAC) zigamije gusanisha amategeko agenga urwego rw’ umurimo w’ubwishingizi n’ibindi.

Depite Rukumbura Rwabyoma John, yavuze ko uyu mushinga w’itegeko uziye igihe kuko bitewe n’amateka y’abanyarwanda hari ukuntu bagiye bafata ubwishingizi mu bindi bihugu, bataha bakabusiga bikarangira gutyo.

Ati “Ahandi, aho wagize ubwishingizi hose, iyo ugeze iwanyu naho uravuga uti hariya ariko nari mfite ubwishingizi nyabuneka nibuvugane. Niba nshaka amadarubindi hakurya hariya nayagura amadolari 700, sinkwiriye kuza kurwana na RAMA ikwiriye kuba ikoreshwa n’undi, nkagira ayo mahitamo rwose RAMA ikaza nyuma yuzuza aho icyo cyuho cyaba gisigaye”.

Yakomeje agira ati “Ikindi kandi ubwishingizi abantu bagiye bafata hirya no hino ntako busa. Nimwagure amarembo habeho ihuzabikorwa, ubwishingizi bwo hanze abantu bafite rwose bwemerwe mu Rwanda. Ahandi birakora no mu Rwanda ubwo tujyanishije n’igihe reka n’aha bikore”.

Dr Uwera yasubije ko kimwe mu bibazo iri tegeko rishya rizakemura harimo guhuza n’ibihugu yaba ibyo mu karere n’ibindi bihugu.

Ati “Iryo huzabikorwa rizabaho kuko itegeko twari dufite hari aho usanga harimo ibyuho ukurikije amategeko y’ibindi bihugu mu karere n’ahandi, uko guhuza ibikorwa kuzabaho”.

Yakomeje avuga ko iri tegeko rizanakemura ikibazo cy’aho mu masezerano y’ubwishingizi hari ubwo umwishingizi afata icyemezo akagifata umugana nta ruhare abigizemo, kuko bose bazajya bahuza amakuru, hirindwe ko hari ushobora gushyiraho n’ibiciro bishobora kuba byabangamira undi.

Uyu mushinga w’itegeko uzaba urimo ibijyanye n’amahame y’ingenzi mu gukora amasezerano y’ubwishingizi nko kuvugisha ukuri n’inyungu ku bwishingizi n’ibindi. Nyuma yo kwemerezwa ishingiro wajyanywe muri komisiyo aho uzasuzumirwa mbere yo kugarurwa mu nteko rusange.

Tanga igitekerezo kuri iyi nkuru

Ibitekerezo:

Nta gitekerezo kiratangwaho.
Now on

Royal FM - 94.3

The Heartbeat of Kigali

Current track
TITLE
ARTIST

Background