Mu ijambo yagejeje ku batuye igihugu uyu munsi kuwa mbere, Perezida Uhuru kenyatta yavuze ko kuva tariki 01 z’ukwezi kwa munani indege zitwara abagenzi ku rwego mpuzamahanga zizasubukura ingendo muri Kenya.
Bwana Kenyatta yavuze ko guhera tariki 15 z’uku kwezi kwa karidnwi indege zitwara abagenzi imbere muri Kenya zo zizaba zemerewe gutangira imirimo yazo.
Hashize amezi atatu indege z’abagenzi zitemerewe kugwa muri Kenya, kimwe no mu bindi bihugu byinshi ku isi, kubera icyorezo cya Coronavirus.
Muri aka karere, mu kwezi gushize Tanzania niyo yabaye iya mbere gufungura ikirere cyayo ku ndege ziva mu mahanga.
Muri weekend ishize, leta y’u Rwanda yatangaje ko ingendo z’indege mpuzamahanga zizatangira tariki 01 z’ukwezi kwa munani.
Mu bindi, Bwana Kenyatta yatangaje harimo kongeraho iminsi 30 igihe cy’amasaha y’umukwabu (kuva saa tatu z’ijoro kugera saa kumi z’igitondo).
Yatangaje gufungura ingendo hagati y’umurwa mukuru Nairobi hamwe n’izindi ntara z’igihugu kuva ejo kuwa kabiri.
Yafunguye kandi insengero n’imisigiti ariko ngo bikaba bitagomba kurenza abantu 100 kandi amasengesho ntarenze isaha imwe, naho utubari two dukomeza gufungwa indi minsi 30.
Inkuru ya BBC
