Inkingo za Covid-19 zo muri Covax zageze mu Rwanda

0
300

U Rwanda rumaze kwakira inkingo za Coronavirus ibihumbi 240 zo mu bwoko bwa AstraZeneca zatanzwe muri gahunda ya Covax igamije kuzikwirakwiza mu bihugu bikennye aho byitezwe ko nyuma y’izi ruza kwakira izindi zo mu bwoko bwa Pfizer-BioNTech. Nk’uko urubuga rwa Twitter rwa minisiteri y’ubuzima rubivuga.

Indege itwaye icyiciro cya mbere cy’inkingo ibihumbi 240 z’icyorezo cya COVID19 zo mu bwoko bwa AstraZeneca yageze i Kigali ahagana saa mbiri za mu gitondo kuri uyu wa 03 Werurwe 2021. Biteganyijwe ko icyiciro cy’izindi nkingo za Covid-19 zo mu bwoko bwa Pfizer zingana na 102,960 zigezwa i Kigali nimugoroba.

U Rwanda rubaye igihugu cya kane muri Afurika gihawe inkingo za Covid-19 muri gahunda ya Covax, nyuma ya Ghana Nigeria na Côte d’Ivoire. Minisiteri y’Ubuzima yatangarije RBA ko ku ikubitiro hazakingirwa abantu 171,480 barimo abakozi bo kwa muganga, abarengeje imyaka 65 y’amavuko, abasanganywe izindi ndwara n’abandi bari ku isonga mu rugamba rwo guhangana na Covid-19.

Muri iyo gahunda kandi mu ijoro ryacyeye, Kenya yakiriye doze miliyoni 1.02 z’uru rukingo rwa AstraZeneca, na DR Congo yakira doze miliyoni 1.7 z’urwo rukingo.

Uyu munsi nimugoroba u Rwanda rurakira izindi doze 102,960 z’urukingo rwa Pfizer, nk’uko bivugwa na minisiteri y’ubuzima mu itangazo yasohoye.

Iyi minisiteri yatangaje ko izo doze zose zizaterwa abantu 171, 480 bashyizwe mu cyiciro cy’abafite ibyago byinshi, mu gihe gukingira bitangira ku wa gatanu w’iki cyumweru.

Mu Rwanda hamaze gutangazwa abantu barenga 19,000 banduye Covid-19 na 265 imaze kwica. Mu itangazo, Minisitiri w’ubuzima Dr Daniel Ngamije yavuze ko bafite “intego yo gukingira 30% by’abaturage b’u Rwanda kugera mu mpera ya 2021, na 60% kugera ku mpera ya 2022”.