Indonesia: Hatowe itegeko ribuza abantu batashyingiranwe gukora imibonano mpuzabitsina

0
171

Inteko ishinga amategeko ya Indonesia yatoye ijana ku ijana itegeko rihana abantu bose bakora imibonano mpuzabitsina batarashyingiranwe imbere y’amategeko.

Iri tegeko ritowe nyuma y’imyaka itatu rinononsorwa kuva mu 2019. Ni nyuma y’uko bisabwe n’abanyamadini bo muri iki gihugu cyiganjemo aba Islam. Ni itegeko byitezwe ko abatari bake bazarijuririra mu nkiko.

Umwanzuro ukimara kujya hanze wamaganywe na benshi biganjemo urubyiruko ndetse banakoreye imyigaragambyo imbere y’inteko ishinga amategeko.

Iri tegeko rireba n’abanyamahanga basura iki gihugu cyane cyane intara ya Bali ikorerwamo ubukerarugendo. Rikaba riteganya igifungo kigera ku mwaka ku bantu bafashwe bakora imibonano mpuzabitsina batarashyingiranwe byemewe n’amategeko.

Uretse ibyo kandi, abantu batashyingiranwe byemewe n’amategeko ntibashobora kubana mu nzu imwe. Ibi nabyo igihe babikoze bishobora kubaviramo gufungwa amezi atandatu mu gihe muryango w’umwe muri bo utanze ikirego.

Umuyobozi w’umuryango uharanira uburenganzira bwa muntu, Human Rights Watch muri Aziya, Elaine Pearson yavuze ko ari ibintu bibabaje ku gihugu nka Indonesia cyafatwaga nk’ikigendera ku mategeko ya Islam adakakaye.

Abashakashatsi bagaragaza ko hari impungenge ko iri tegeko ryazajya ryibasira ab’igitsina gore kurusha abagabo nk’uko byagaragaye mu bihugu bimwe na bimwe byo mu kigobe.

Muri Indonesia habarurwa abantu barenga miliyoni babana batarasezeranye imbere y’amategeko cyane abaturage basanzwe bo mu byaro. Bivuze ko abo bose bashobora guhita bahanwa n’itegeko.

Uretse iri tegeko, hatowe n’itegeko rihana umuntu wese ukangurira abandi kutemera Imana ndetse no kunenga ibyemezo bya Leta. Cyakora imyigaragambyo ikozwe mu nyungu rusange iremewe.