Ikibazo cya M23 ku meza y’ibiganiro i Nairobi, amategeko ya Covid-19 yatumye abashinwa bigaragambya: Amakuru agezweho ku isi

0
190

Abakuru b’ibihugu bigize Umuryango wa Afurika y’iburasirazuba, EAC bahuriye mu biganiro bigamije gushakira umuti ikibazo cy’umutekano muke umaze igihe mu Burasirazuba bwa Repubulika Iharanira Demokarasi ya Kongo.

Ni ibiganiro byayobowe na Gen. Evariste Ndayishimiye, Perezida w’u Burundi akaba n’umuyobozi wa EAC naho Uhuru Kenyatta wabaye Perezida wa Kenya akaba umuhuza.

Bamwe mu bayobozi babyitabiriye mu buryo bw’ikoranabuhanga.

Ibi biganiro bigamije gukemura ikibazo cy’imitwe yitwaje intwaro muri Kongo cyane cyane uwa M23 umaze iminsi wigarurira uduce twinshi tw’intara ya Kivu y’amajyaruguru.

Mu cyumweru gishize ibiganiro nk’ibi byabereye i Luanda muri Angola, M23 yemera gushyira intwaro hasi, nyamara nyuma yaho inkuru zitanukanye zavugaga ko imirwano ikomeye yongeye gushyamiranya uyu mutwe n’ingabo za Leta FARDC.

Umutwe wa M23 uvuga ko urwanira uburenganzira bw’abaturage b’anyekongo bavuga ikinyarwanda biganjemo abo mu bwoko bw’Abatutsi. Ivuga ko bahohoterwa ndetse bakanicwa bidasobanutse.

Leta ya Kongo yo ivuga ko uyu mutwe ari umutwe w’iterabwoba ndetse ikaba itaniteguye kwicarana nawo mu biganiro.

Equatorial Guinea: Perezida Nguema yatorewe manda ya 6

Perezida wa Equatorial Guinea, Teodoro Obiang Nguema Mbasogo yatorewe kuyobora iki gihugu ku nshuro ya gatandatu, bituma aba umuyobozi wa mbere ku isi umaze igihe ku butegetsi.

Perezida wa Komisiyo y’amatora yavuze ko Obiang yatsinze amatora ku kigero cya 94,9% akaba agiye kuyobora igihugu mu myaka irindwi iri imbere.

Obiang ayobora Equatorial Guinea kuva mu 1979.

CHINA: Abaturage bigaragambije bamagana ingamba “zikarishye” zo kurwanya COID-19

Mu mijyi itandukanye y’u Bushinwa abaturage bashotse mu mihanda basaba Leta ko ikuraho ingamba yashyizeho zo kurwanya Covid-19 muri gahunda yiswe “Zero – Covid”.

Mu mpera z’icyumweru gishize no kuri uyu w ambere, abaturage bakoze imyigaragambyo basaba Leta koroshya ingamba zo kwirinda icyorezo cya Covid-19.

Mu mijyi ya Shanghai, umurwa mukuru Beijing abaturage babyutse bitwaje impapuro zitanditseho ikintu nyuma y’uko abenshi batawe muri yombi bazira kwitwaza impapuro ziriho ubutumwa.

Uburakari bw’abatrage bwatewe n’uko abantu icumi baherutse kwicwa n’inkongi y’umuriro muri Urumqi, bikavugwa ko ubutabazi bwatinze kubageraho kubera ko ako gace kari muri Guma mu rugo.

Muri izi ngamba za “Zero-Covid”, biteganijwe ko agace kagaragayemo umuntu wanduye Covid-19 gahita gashyirwa muri Guma mu rugo, abaturage bagapimwa buri munsi.

Guverinoma y’u Bushinwa ivuga ko hari izindi mbaraga ziri inyuma y’iyi myigaragambyo.