Ghana mu gikombe cy’isi: Umunsi wo kwihimura, u Budage mu marira

0
146

Imikino y’amatsinda y’igikombe cy’isi gikomeje kubera muri Qatar irasozwa kuri uyu wa gatanu tariki 02/12/2022, aho andi makipe abiri yo ku mugabane wa Afurika ashobora gukora amateka agakomeza muri 1/8.

Mu 2010 ubwo Afurika yakiraga bwa mbere igikombe cy’isi, habuze gato ngo uyu mugabane ukore amateka yo kugera muri 1/2 cy’iri rushawa. Ghana yagarukiye ku muryango winjira muri 1/2 ubwo yananirwaga gusezerera Uruguay. Uyu mukino wabereye kuri Sitade ya mbere nini muri Afurika, Soccer City mu mujyi wa Johannesburg imbere y’abafana 84,017.

Ghana irasabwa gutsinda cyangwa kunganya na Uruguay kugirango ibone itike ya 1/8 ku nshuro ya 3 mu mateka

Kugeza ku munota wa 120, amakipe yombi yanganyaga 1-1. Mu masegonda ya nyuma y’umukino Dominic Adiyiah yateye umutwe ugana mu izamu, Luis Suarez awukurishamo amaboko, umusifuzi Olegário Benquerença wo muri Portugal amuha ikarita itukura asohoka mu kibuga. Rutahizamu wa Ghana, Asamoah Gyan ateye penaliti ayitera ku mutambiko w’izamu, umukino urangira utyo.

Kugirango haboneke ikipe ikomeza muri 1/2, hiyambajwe penaliti maze Uruguay yinjiza 4-2, Ghana isezererwa ityo.

Kuri uyu wa gatanu ni amahirwe ya Ghana yo kwihimura ubwo iza kuba ikina na Uruguay kuri Al Janoub STADIUM.

U Budage bwongeye gusererwa butarenze amatsinda

Ikipe y’igihugu y’u Budage imaze gutwara igikombe cy’isi nshuro enye yongeye gusererwa itarenze amatsinda ku nshuro ya kabiri yikurikiranya. Nubwo Die Mannschaft yari yatsinze Costa Rica 4-2, yananiwe gukomeza muri 1/8 kuko yanganyaga amanota na Spain ariko batandukanywa n’umubare w’ibitego bazigamye.

u Budage bwasezerewe kubera ikinyuranyo cy’ibitego

Ubwo imikino y’amatsinda iza kuba isozwa, amakipee ya Cameroon na Ghana ahagarariye Afurika afite amahirwe yo kwiyongera kuri Morocco na Senegal zamaze kugera muri 1/8.

Amakipe amaze kubona itike ya 1/8 ni 14: U Buholandi, Senegal, u Bwongereza, USA, u Bufaransa, Australia, Argentina, Poland, Morocco, Croatia, u Buyapani, Spain, Brazil na Portugal