France: Perezida wa FFF akomeje kotswa igitutu kubera amagambo yavuze kuri Zidane

0
129
French Football Federation (FFF) President Noel Le Graet walks along the pitch prior to the UEFA EURO 2020 round of 16 football match between France and Switzerland at the National Arena in Bucharest on June 28, 2021. (Photo by FRANCK FIFE / various sources / AFP)

Umuyobozi w’Ishyirahamwe ry’Umupira w’Amaguru mu Bufaransa, Nöel Le Graët akomeje kotswa igitutu n’abatari bake nyuma y’amagambo yavuze ku cyamamare Zinedine Zidane.

Kuri uyu wa gatandatu Inteko rusange ya FFF yemeje ko umutoza mukuru w’ikipe y’ihigugu y’u Bufaransa, Didier Deschamps yongererwa amasezerano kugeza mu 2026; ibintu byatunguye bamwe kuko mbere y’igikombe cy’isi havuzwe amakuru y’uko Zidane ari we uzasimbura Deschamps.

Mu kiganiro yagiranye na RMC Sport kuri iki cyumweru, Le Graët abajijwe niba Zidane yakwishakira akandi kazi yasubije agira ati:

Ndabizi ko abenshi bifuzaga ko Deschamps agenda, akazi kagahabwa Zidane. Ariko se ubu ugiye kwirukana Didier Deschamps wavuga ko umuhoye iki? Zidane afite uburenganzira bwo kujya gutoza aho ashaka, ibyo ntibindeba.Sinigeze mvugana nawe ku byo kumuha akazi ariko n’iyo ampamagara ashaka ko tubivuganaho sinari kumuha uwo mwanya.”

Ibi rero byateje uburakari mu batari bake babifata nko kutubaha Zidane. Uwa mbere wakije umuriro ni Kylian Mbappe wavuze ko umuntu w’umunyabigwi nka Zidane atari akwiye gusuzugurwa kariya kageni.

Abatari bake barimo n’abavuga rikijyana bahise bunganira Mbappe bavuga ko Le Graëtakwiye kweguzwa byihuse.

Real Madrid Zidane yakoreyemo amateka yo kuba umutoza wa mbere utwaye UEFA Champions League inshuro eshatu zikurikirana yabyutse yenyegeza uyu muriro. Mu itangazo yashyize ahagaragara yagize iti:

Real Madrid iramagana amagambo yatangajwe n’umuyobozi wa Federation y’umupira w’amaguru mu Bufaransa, Nöel Le Graët kuri Zinedine Zidane.

Aya magambo aratesha agaciro umuntu ukundwa na benshi mu bakunzi b’umupira ku isi yose. Turasaba ko habaho kuyakosora byihuse.

Zidane ni intangarugero ku bato n’abakuru. Ni icyitegererezo kandi ibi byamuranze mu gihe cyose yari umukinnyi cyangwa umutoza. Ibyo Noel Le Graet yavuze ntibikwiye umuyobozi uri mu nshingano nka ziriya.

Si ubwa mbere kandi kuko mu 2021 uyu muyobozi yavuze amagambo atarimo icyubahiro kuri Karim Benzema.

Mu gihe yari umukinnyi, Zinedine Zidane yatwaye igikombe cy’u Burayi mu 2000, atwara igikombe cy’isi mu 1998 kongeraho ibyo yatwaye ari umutoza muri Real Madrid.