Carlos Vila Nova yatorewe kuyobora Sao Tomé-et-Principe

0
336

Carlos Vila Nova yatorewe kuyobora Sao Tomé-et-Principe ahigitse Guilherme Posser da Costa bari bahatanye muri aya matora y’Umukuru w’Igihugu.

Komisiyo y’Amatora muri Sao Tomé-et-Principe yatangaje ko ibarura ry’agateganyo ryerekana ko Carlos Vila Nova yatowe ku kigero cya 57.54% mu gihe Guilherme Posser da Costa yatowe ku kigero cya 42.46%.

Carlos Vila Nova abaye Perezida wa Sao Tomé-et-Principe nyuma yo kwegukana icyiciro cya kabiri cy’amatora, icya mbere yari yacyegukanye muri Nyakanga 2021.

Uyu mugabo w’imyaka 69 si mushya muri politike ya Sao Tomé-et-Principe kuko yabaye depite ndetse na Minisitiri w’Umurimo, ibikorwaremezo, umutungo kamere n’ibidukikije. Guilherme Posser da Costa ahigitse we yabaye Minisitiri w’Intebe.

Carlos Vila Nova agiye kuyobora ibi birwa asimbura Evaristo Carvalho wari wagiyeho muri 2016 ariko akaza gufata umwanzuro wo kutazongera kwiyamamaza.