Amakuru agezweho mu mikino: Pelé agiye gushyingurwa – Cristiano yageze muri Saudi Arabia

0
125

Perezida wa Fifa, Gianni Infantino yavuze ko ishyirahamwe ayoboye rigiye gusaba amashyirahamwe y’umupira w’amaguru mu bihugu byose ku isi kuzafata Stade imwe bikayitirira igihangange muri ruhago Edson Arantes do Nascimento Pelé witabye Imana ku wa kane w’icyumweru gishize afite imyaka 82.

Infantino yavuze ko ibi biri mu rwego rwo guha icyubahiro uyu mugabo wahoze ari rutahizamu wa Brazil akayifasha gutwara ibikombe by’isi bitatu mu 1958, 1962 na 1970.

Biteganijwe ko Pele ari bushyingurwe uyu munsi iwabo muri Brazil.

Mbere yo ku mushyingura, umurambo we wagejejwe kuri Stade ya Santos aho abafana benshi baraye ijoro bategereje kumusezeraho. Bmwe bumvikanaga baririmba ngo: “Viva O Rei” bisobanuye ngo: “Harakabaho Umwami”.

Ishyirahamwe ry’umupira w’amaguru muri Brazil rivuga ko mu gihe yakinaga, yatsinze ibitego birenga igihumbi.

Ni we mukinnyi ukomeye ku isi ariko utarigeze akinira ikipe y’i Burayi.

Pelé yakiniye Santos imyaka 18 kuva mu 1956 kugeza mu 1974, indi ibiri ayikina muri New York Cosmos.

Muhadjiri agiye kugaruka mu Rwanda

Rutahizamu w’umunyarwanda Hakizmana Muhadjiri agiye kugaruka mu Rwanda nyuma yo gusesa amasezerano n’ikipe ye ya Al Kholood mu cyiciro cya kabiri muri Saudi Arabia .

Hakizimana Muhadjiri

Gusesa aya masezerano bivugwa ko byamuhesheje amafaranga agera kuri M120. Iyi kipe yari yayisinyiye mu kwezi kwa 6 avuye muri Police FC mu Rwanda. Iyi ni ikipe ya kabiri yo mu Barabu akiniye ndetse ikaba iya kabiri akiniye hanze y’u Rwanda.

Ku rundi ruhande ni nako mukuru we Haruna Niyonzima yitegura gufata indege ajya muri Libya aho yaguzwe n’ikipe yo mu cyiciro cya mbere ya Al Ta’awon SC akayisinyira umwaka umwe. Haruna yakiniraga AS Kigali.

AS Kigali: Haruna ashobora gusimbuzwa umunya Ghana

AS Kigali yamaze kumvikana na Etincelles kuri rutahizamu w’umunye Ghana Soumaila Moro umaze gutsinda ibitego 9 muri Etincelles.

AS Kigali itegereje ko Al Ta’awon SC iyishyura amafaranga yaguze Haruna ikabona kwishyura Etincelles. Uyu rutahizamu yanifujwe na Rayon Sports ariko igorwa no kuba itari ifite amafaranga yose umukinnyi yifuzaga.

Ubu rero Rayon Sports bivugwa ko yerekeje amaso kuri rutahizamu wo muri DR Congo, Emmanuel Kum- Mindeke, aho impande zombi zamaze kumvikana.

Basketball: Umwaka w’imikino uzamara amezi icyenda

Ishyirahamwe rya Basketball mu Rwanda, FERWABA ryatangaje ingengabihe yose y’umwaka w’imikino aho Shampiyona y’icyiciro cya mbere izatangira ku wa gatanu tariki 13 z’ukwezi kwa mbere.

Amatariki y’ingenzi muri Basketball

  • 13/01/2023: Umunsi wa mbere
  • 11/02/2023: Umusi wa 13 – Patriots VS. APR
  • 17/02/2023: Umunsi wa 14 – REG VS. APR
  • 24/02/2023: Umunsi wa 18 – REG VS. Patriots
  • 03-05/03/2023: Rwanda Cup
  • 17/03/2023: Imikino yo kwishyura
  • Gicurasi 2023: BAL, 3rd Season
  • 14-18/06/2023: Genocide Memorial Tournament
  • 01/07/2023: Umunsi wa nyuma wa Regular season
  • 11/08/2023: Umunsi wa mbere wa Playoffs (Semifinals)
  • 23/08/2023: Playoffs Finals – Game 1
  • 03/09/2023: Playoffs Finals – Game 7
  • 09/09/2023: All Star Game
Nshobozwabyosenumukiza Jean Jacques Wilson

Ikipe nka APR ni imwe mu zitegerejwe nyuma yo kugura abakinnyi beza barimo Nshobozwabyosenumukiza Jean Jacques Wilson, Ntore Habimana, Kaje Elie na Axel Mpoyo.

Ronaldo yageze muri Saudi Arabia yakirwa nk’umwami

Cristiano Ronaldo yageze muri Saudi Arabia nyuma yo gusinyira ikipe yo muri icyo gihugu ya Al Nassr yamutanzeho agera kuri Miliyoni 175 $.

Yageze i Riadh aherekejwe n’umuryangowe, ni ukuvuga umugore we Georgina Rodriguez n’abana babo.

Ronaldo watsindiye igihembo cya Ballon d’Or isnhuro eshanu yari aherutse gutandukana na Manchester United nyuma yo gutangaza amagambo atarashimishije ubuyobozi.

Biteganijwe ko ari bwerekanwe kuri uyu wa kabiri nyuma ya saa sita mu muhango uri bwitabirwe n’abafana benshi.

Sébastien Haller yakize Cancer atangira imyitozo

Rutahizamu Sébastien Haller wa Borussia Dortmund mu Budage yasubukuye imyitozo nyuma yo kumara amezi atandatu hanze y’ikibuga avurwa Cancer yo mu bugabo.

Uyu munya Cote d’Ivoire waguzwe muri Ajax Amsterdam nyuma yo kuyitsindira ibitego 33 mu mwaka w’imikino 2021-22 yasanzwmo Cancer mu kwezi kwa karindwi 2022 ubwo ikipe ye yakoreraga imyitozo mu Busuwisi yitegura Shampiyona.