1/2 cya 2020 impinduka ndwi zikomeye mu buyobozi.

0
177

Mu mezi atandatu ashize hagiye havugwa byinshi bijyanye n’ubwegure haba munzego z’uturere, intara ndetse by’umwihariko ibyavuzwe cyane ni uguhagarikwa kw’abayobozi muri za ministeri ibyahujwe kenshi n’ ikiswe kubazwa ishingano.

Ku ikubitiro mu cyumweru kimwe, Abaminisitiri 3 bashyikirije Minisitiri w’intebe inyandiko z’ubwegure bwabo ku bushake.

Amabaruwa y’ubwegure bw’aba bayobozi bombi bayashyikirije Minisitiri w’Intebe, Dr Ngirente Edouard, tariki ya 6 ukwezi kwa kabiri 2020.

Mu itangazo ryanyujijwe ku rukuta rwa Twitter rw’Ibiro bya Minisitiri w’Intebe, ryavugaga ko  “Kuri uwo  mugoroba, Minisitiri w’Intebe Dr. Edouard Ngirente yakiriye ubwegure bw’Abanyamabanga ba Leta Evode Uwizeyimana wo muri Minisiteri y’Ubutabera na Dr Isaac Munyakazi wo muri Minisiteri y’Uburezi, azashyikiriza Nyakubahwa Perezida wa Repubulika.’’

Taliki ya  12 ukwezi kwa kabiri 2020, Nyakubahwa Minisitiri w’Intebe Dr. Edouard Ngirente yabamenyesheje  ko Nyakubahwa Perezida wa Repubulika yemeye ukwegura kwabo

Nyuma y’iminsi 2, hakurikiyeho Dr Diane Gashumba wari Minisitiri w’Ubuzima na we ashyikiriza ubwegure bwe Minisitiri w’intebe.

Kuri Evode Uwizeyimana na Dr Isaac Munyakazi ntibyatunguranye kuko bo hari hamaze iminsi havugwa amakosa bakoze. Tariki ya 03 mu kwezi kwa kabiri 2020 binyuze ku mbuga nkoranyambaga ni bwo byamenyekanye ko bwana Evode Uwizeyimana yahutaje umugore ukorera sosiyete irinda umutekano ya Isco ubwo yamusabaga kunyura mu cyuma kigenzura umutekano akanga gucamo.

Muri iyo minsi  hahise hanatangira kuvugwa amakuru ko n’Umunyamabanga wa Leta muri Minisiteri y’Uburezi ushinzwe amashuri abanza n’ayisumbuye, Dr Isaac Munyakazi na we ashobora kuba ari kubazwa n’inzego z’ubutabera ku cyaha cya ruswa. Iyegura rya Munyakazi ku wa 12 Gashyantare 2020 rikaba ryaraje rishimangira ayo makuru yari amaze iminsi amuvugwaho.

Naho kuri Dr Diane Gashumba wari Minisitiri w’Ubuzima, ubwegure bwe busa n’ubwatunguranye gusa itangazo ryavuye mu biro bya Minisitiri w’intebe rivuga iby’ubwegure bwe we ryanahise rinavuga icyamuteye kwegura.

Ibi byateye urujijo kuko Dr Diane Gashumba yari mu baminisitiri bafatwa nk’abanyamwete ku murimo ndetse hari n’abamugize Minisitiri wahize abandi.

Impamvu zateye ubwegure bw’aba bayobozi, bose zaje kugaragazwa na Perezida wa Repubulika ku wa taliki ya 16 ukwezi kwa kabiri  2020 ubwo yatangizaga  Umwiherero w’uyu mwaka w’abayobozi bakuru i Gabiro mu karere ka Gatsibo, Intara y’Uburasirazuba.

Taliki 11 uku kwezi twifuje  kumenya aho dosiye zaba bombi zaba zigeze nyuma yuko Urwego rw’Ubugenzacyaha, RIB ruzishyikirije ubushinjacyaha   mu kiganiro kihariye n’ umuvugizi w’ubushinjacyaha NKUSI Faustin yavuze ko dosiye ya evode impande zombi zahisemo kumvikana hagafatwa ikemezo cyo kuyirangiza hakurikijwe itegeko.

Yagize ati : ”Dosiye twayifatiye icyemezo byararangiye. Impande zombi nk’uko biteganywa n’ingingo ya 24 y’itegeko imiburanishirize y’imanza z’inshinjabyaha….Evode n’uwari bahohotewe bahisemo kumvikana… ibyo byarakozwe bamaze kumvikana…..bimaze gukorwa nta kindi twari gukora uretse ko twafashe icyemezo cyo kuba tuyishyinguye kuko ibyo ng’ibyo byubahirijwe.”

Naho kuri dosiye ya munyakazi ,nkusi faustin avuga ko ubushinjacya bugikora iperereza kubyaha akurikiranweho

Hadashize amezi abiri taliki ya 27 ukwezi kwa kane  2020 m u itangazo ryashyizwe ahagaragara n’Ibiro bya Minisitiri w’Intebe, ryavugaga  ko General Patrick Nyamvumba yakuwe ku mirimo ye kubera iperereza riri kumukorwaho.

Iryo tangazo ryavugaga ko General Patrick Nyamvumba agomba guhita asubira ku kicaro gikuru cy’Ingabo z’Igihugu, mu gihe hategerejwe gufatwa ikindi cyemezo.

Taliki ya  09 ukwezi kwa  kane Perezida Paul Kagame yavanye kandi  ku mirimo Ambasaderi Olivier Nduhungirehe wari Umunyamabanga wa Leta muri Minisiteri y’Ububanyi n’Amahanga n’Ubutwererane ushinzwe Umuryango w’Ibihugu bya Afurika y’Iburasirazuba, kubera imikorere yamuranze yo gushyira imbere imyumvire ye kurusha politiki y’igihugu.

Taliki ya 25 ukwezi kwa gatantu kandi Bwana Gasana Emmanuel wari Guverineri w’Intara y’Amajyepfo na Bwana Gatabazi Jean Marie Vianney wari Guverineri w’Intara y’Amajyaruguru, bahagaritswe ku mirimo kubera ibyo bagomba kubazwa bakurikiranyweho.

Hari izindi mpinduka mu buyobozi zagiye zikorwa ariko muri iyi nkuru harimo izavuzwe cyane muri aya mezi atandatu ashize.

Biragoye kumenya icyo aba bahoze ari abayobozi bakomeye ubu bari gukora kuko bamwe muribo twagerageje kubavugisha batubwiye ko babona atari byiza gushyira ibyo bakora ubu mu itangazamakuru.

muri aba bayobozi bavuzwe mu nkuru ntanumwe urashyirwa mu mwanya w’ ubutegetsi nkuwo yariho uzwi kugeza ubu.